Ek glo in God die Vader, - - - . En in Jesus Christus - - -. Van waar Hy sal kom om te oordeel die wat nog lewe en die wat reeds gesterf het.
Vir bykans 2000 jaar bely ons, vewag ons - - - en hoop ons ! En hierdie verwagting is ook die hoop vir ‘n verwarde wêreld. Hoop vir die wêreld omdat hierdie Jesus wat ons verwag dieselfde Jesus is wat gely het onder Pontius Pilatus, gekruisig is, gesterf het en begrawe is - - - ; dieselfde Jesus wat op die derde dag weer opgestaan het uit die dode.
“Hierdie Jesus wat van julle af na die hemel toe opgeneem is, sal netso terugkom soos julle Hom na die hemel toe sien opgaan het” (Hand. 1 :11)
Die belydenis sê onomwonde dat Jesus weer kom om te oordeel. Hierdie oordeel is die doel van van Sy koms in heerlikheid. Die Openbaring van Jesus Christus waarna Christene al so lank gretig uitsien, is die konfrontasie van die hele mensdom met die geregtgheid van God. Dit is die dag wanneer elke knie voor Homs al buig en elke tong sal bely dat Jesus die Here is.
“Kyk, Hy kom met die wolke, en al die mense sal Hom sien, ook hulle wat Hom deurboor het; en al die volke van die aarde sal oor Hom in selfverwyt weeklaag. Ja, dit is seker !
Ek is die Alfa en die Omega, sê die Here God, Hy wat is en wat was en wat kom, die Almagtige” ( Opb. 1 : 7,8 ).
Om te leef in afwagting beteken dat ons lewe nou reeds bepaal sal word deur die verwagte toekoms van God se Koninkryk en sy geregtigheid en regverdigheid. Dat ons nou al iets sal tentoonstel van die nuwe bedeling wat Christus sal bring met Sy koms. Om hoop vir die wêreld te wees, moet Christene nou reeds die Koninkryk van God aan die wêreld wys. Ons lewens moet bepaal word deur die hoop van die komende Koning.
Lewe en aksie in verwagting van God se toekoms is ‘n lewe in die gemeenskap van Christus wat lewe volgens die riglyne van die bergpredikasie.
“Gelukkig is almal wat hartseer is oor al die pyn en swaarkry in hierdie wêreld - - - almal wat van God se goedheid en sorg afhanklik is. - - -
Gelukkig is almal wat nie dink dat hulle belangriker as ander mense is nie - - - almal wat met alles in hulle daarna streef om te doen wat God vra. - - - wat regtig vir ander mense omgee - - - wie se lewe van binne af nuut word - - - almal wat vrede maak tussen mense wat in vyandskap met mekaar leef - - - almal wat deur ander mense beledig en vervolg word omdat hulle doen wat God vra” ( Matt. 5 : 3-10 ).
Om te lewe in afwagting van Jesus se wederkoms, beteken om te streef na geregtigheid wat vrymaak, wat dinge wat verkeerd is regmaak, wat regverdigheid bewerkstellig in ‘n wêreld waar onreg die botoon voer, om die ander wang te draai, 0m die tweede myl te loop, om ook die onderkleed te gee as daar gevra word vir my bokleed. Om nou reeds ‘n wêreld te help skep wat werklik hoop vir ‘n verwarde mensdom bring. Dan sal die wêreld ons weer glo.
“Hy wat dit alles getuig, sê : Ja, Ek kom gou !
Amen ! Kom, Here Jesus !” ( Opb. 22 : 20 )