Ek is Pierre en ek is in 'n verhouding met my Pappie, God - drie-enige: Vader, Seun en Heilige Gees. Ek is deur die bloed van Jesus vrygekoop en die prys vir my sonde is vereffen. Ek is Sy kind - 'n Koning se kind. Hy het aan my outoriteit gegee om hier op aarde te heers terwyl sy Gees my lei, - 'n mens bepaal sy pad, maar die Here bepaal hoe hy loop (Spreuke 16:9), God leer my hoe om te lewe. By Hom is daar oorvloedige blydskap. Uit sy hand kom net wat mooi is, (Psalm 16:11). Nie met mag en krag sal ek slaag nie, maar deur God se Gees, (Sagaria 5:6). Ek laat wat ek doen, aan die Here oor, dit is waarom my voornemens geluk, (Spreuke 16:3).

Die woord van God is die lamp wat vir my die weg wys. Dit is die lig op my pad, (Psalm 119).

Hy se vir my dat hy my altyd in gedagte het. Hy het my naam in Sy hand palms gegraveer, (Jesaja 49:16)

God het my nog voordat ek in die moederskoot gevorm is, geken; voordat ek gebore is het Hy my aan Hom gewy en my as 'n profeet aangestel, (Jeremia 1:5)

Die Here is my herder, ek kom niks kort nie. Hy laat my rus in groen weivelde. Hy bring my by waters waar daar vrede is. Hy gee my nuwe krag.

Hy lei my op die regte paaie tot die eer van sy Naam.

Selfs al gaan ek deur donker dieptes, (ja dit gaan gebeur want ek het Hom gevra en Hy het my 'n avontuur van 'n lewe belowe - halleluja en amen), sal ek nie bang wees nie, want Hy is by my. In Sy hande is ek veilig.

Hy laat my by 'n feesmaal aansit, terwyl my teestanders moet toekyk. My Pappie ontvang my soos 'n eregas, en ek word oorlaai met hartlikheid. Sy goedheid en liefde sal my hele lewe lank by my bly en ek sal tuis wees in die huis van die Here tot in ewigheid, (Psalm 23).

God het vir my 'n knap vrou voorberei wat ek binnekort sal kry. Sy is baie meer werd as edelstene. Sy sal my ondersteun en sy sal die vrugte van haar werk pluk. Sy gaan vir my voordeel bring en nie nadeel nie, (vir die res van ons lewens lank saam). Sy oorweeg die waarde van 'n stuk grond en koop dit, sy sit dit onder wingerd met geld wat sy self verdien het. Sy stel vas of die wins goed is, haar lamp bly heelnag brand. Sy het 'n oop hand vir die armes, sy is vrygewig teenoor die behoeftiges. Sy is gerus oor haar huisgesin as dit sneeu: hulle dra almal warm klere. Alles aan haar spreek van 'n sterk en edel persoonlikheid; sy ken geen kommer oor die toekoms nie. As sy praat, is dit met wysheid; as sy leiding gee, is dit met liefde. Sy hou goeie toesig oor haar huishouding; lui is sy nie. Haar kinders prys haar, en ek bewonder haar: Daar is baie knap vrouens, maar sy oortref almal!!! - 'n Vrou presies soos die Here my beloof het, (Spreuke 31).

Die Here beloof my dat ek oor my kinders sal bly wees soos 'n vrou oor halsnoere, soos 'n bruid oor haar juwele, (Jesaja 49:18).

Ek vertrou op die Here. Wanneer ek uitgeput en oorlaai is gaan ek na Jesus toe. Hy gee vir my rus. Ek neem sy juk op en leer gretig van Hom want Hy is sagmoedig en nederig van hart en Hy gee vir my gemoedsrus. Sy juk is sag en Sy las lig, (Matteus 11:28).

Soos wat uit hierdie skrywe gesien kan word, is ek buitengewoon spesiaal. Ek is 'n Koningskind wat geseend is met 'n perfekte avontuurlewe, perfekte vrou vir my en kinders wat ek aan God opgedra het - oor wie ek altyd trots en opgewonde sal wees. Ek is 'n profeet en heerser wat niks kort kom nie.