deur Stephan Joubert

Sê nou jy sou die kans kry om oor te begin, wat sou jy anders doen? Wel, volgens 'n stukkie navorsing wat ek gelees het, wil die meeste mense graag iemand anders wees as hulle sou kon oorbegin. Hoe jammer dat die storie van ons eie lewens, waarvan ons die hoofskrywers is, dikwels in fiasko's ontaard. Weet jy, jy het 'n kans om oor te begin op die Here se terme. Jy het minstens nog die res van die dag voor jou om dit te doen.

Vandag is nog propvol onopgebruikte ure, minute en sekondes. Jy het die keuse of jy dit gaan aangryp en die beste daarvan maak tot eer van die Here, en of jy die res van vandag maar net jou ou self gaan bly. Moenie dit doen nie! Kies om vandag oor te begin in die Here se Naam. Laat Sy lig in iemand anders se lewe skyn. "Hoe?" vra jy. Wel, ek het iewers 'n advertensie van 'n Amerikaanse motorolie vervaardiger raakgelees wat hier van toepassing is. Dit het gelui: "We don't want to change the world. We just want to change your oil!" Jy en ek hoef nie die hele wêreld te verander nie. Ons moet maar net in Jesus se Naam 'n lewende seën wees vir een mens wat ons pad verder deur die loop van vandag kruis. Dis die regte soort oorbegin! Ons kan vandag vir minstens een ander persoon vreugde bring deur 'n SMS, 'n oproep of 'n vinnige besoek. Ons kan vandag een ander persoon se ou lewensolie vervang met nuwe hemelse olie propvol hoop en vreugde. Dan loop ons eie lewensbekertjie net daar self vol. Dan begin ons ook reg oor tot eer van die Heer.


Ek bid

Laat U lig vandag deur my skyn
Laat my vandag smaak gee waar smaakloosheid wen
Laat my hoop gee waar hooploosheid triomfeer
Laat my vandag oorbegin tot eer van Christus

Amen