"Ons moet net meer bid. Dan sal dit beter gaan in die land." So sê iemand nou die dag. Almal stem dadelik saam. "Hoe weet julle dit?" vra iemand uit die bloute. Terwyl almal met monde vol gekroonde tande rondsit, antwoord een: "Die Bybel sê so." "Ja," beaam die res dit. "Waar in die Bybel lees julle dat gebed se primêre funksie is om veiliger lewensomstandighede vir almal te verseker?" vra hierdie persoon. Nogeens is daar 'n stilte. "Daar staan iewers 'bid en vir julle sal gegee word,'" antwoord iemand. "Ja, maar beteken dit alles in die land sal skielik beter gaan as ons net groter volumes gebed hemelwaarts stuur?" wil die vraagsteller weet. "Dink julle regtig daar is 'n gebedsmeter iewers in die hemel wat meet hoe lank ons elkeen bid, of hoeveel mense vir 'n bepaalde saak bid en dan kry sulke gebede voorkeur by God bo enkelinge se opregte gebede?" wil die vraagsteller weet.

Hy gaan voort: "Gebed is nie 'n quick fix nie. Gebed gaan eerstens oor God en oor Sy eer. As daar mense is wat wel deur gebed verander moet word, dan is dit eerstens die bidders self." Toe begin almal gelyk praat. Party stem saam, ander nie. Ekself het daar weggestap met nuwe gedagtes oor gebed.

Ek glo gebed is 'n belangrike manier om God se wil te laat gebeur. Maar dalk is my gebede te selfsugtig. Soms bid ek vir 'n beter land net sodat ons almal kan voortgaan met ons gemaklike leefstyle. Gee ons regtig om vir mense wat ly, of wil ons maar net al biddende keer dat ons die volgende slagoffers van slegte dinge is? Daarom my versugting vandag saam met die dissipels in Lukas 11: "Here, leer ons bid!"