deur Stephan Joubert

Jy is wat jy kyk! TV programme is nie maar net aldag goeie tyd-verdryf nie. Dit vorm jou denke. Dit skaaf aan jou menswees. G'n wonder nie dat TV verslawing deur verskeie sosiale kundiges uitgewys word as een van die grootste probleme wat mense se geestesgesondheid en aanpasbaarheid strem. Dit verander te veel mense in rusbank-aartappels ("couch potatoes") wat hulle stukkie vir stukkie beroof van hul kreatiewe denke en aktiewe betrokkenheid in die lewe.

Kies jou TV progrmame baie versigtig. Kyk dit met oorleg. Nee, jy hoef nie nou skielik teen alles en almal op daardie kassie te wees nie. Dit help ook nie om die baba met die badwater en al uit te gooi nie. Daar is steeds kosbare goud te vind in flieks, verhale en ander TV programme. Laat jou geloof in Christus die filter wees waardeur jy ook TV kyk. Laat jou kernwaardes van respek, omgee en integriteit nuwe lesse haal uit elke storie wat jy wel kyk. Deel dit met ander. Gebruik die lesse wat jy geleer het as aanknopingspunte om mense te leer om anders te kyk, anders te dink, anders te leef. Laat die TV vir jou werk, nie andersom nie.