Christene is nie outomaties die gelukkigste mense op aarde nie. Dit geld ook nie vir aanhangers van ander gelowe nie. Van geluk gepraat, die gelukkigste mense op aarde is blykbaar die inwoners van Ysland, met Denemarke in die tweede plek — as jy die Wêreld Databasis van Geluk se navorsing glo. Volgens studies onder 144 nasies in die wêreld is die mees ongelukkige mense op aarde tans dié in Tanzanië, gevolg deur inwoners van Zimbabwe. Ons as Suid-Afrikaners bevind onsself iewers tussen nommer 61-65 op hierdie geluk-leer.
Geluk het vir die meeste aardbewoners te make met lewenskwaliteit. Die probleem egter met hierdie omgewing-gebaseerde verstaan van geluk is dat daardie einste geluk soos mis voor die son verdwyn sodra uiterlike omstandighede verander. Kyk maar wat in vele eerstewêreldlande gebeur het na die ineenstorting van die ekonomie sedert 2008. Toe het vele mense se geluk in een oogwink by die agterdeur uitgewaai.

Geluk wat nie uit jou hart kom nie, is tydelik. Dis papierdun. Dis wisselvallig. Soek en vind jou geluk elke dag in jou verhouding met die Here. Sy teenwoordigheid is nie van jou omstandighede afhanklik nie; ook nie van die omstandighede in Suid Afrika, of waar jy ook al in die wêreld woon nie. Hoor weer. Die Here se goedheid word nie gemeet aan jou eie omstandighede nie! Die Bybel is vol daarvan dat die Here Homself in moeilike omstandighede op besonderse maniere laat vind. Hy is die Rots in gevaar en 'n Uitkoms in die dag van nood. Sy goedheid is meer as genoeg onder alle omstandighede. Maar dan moet Hy jou enigste Herder wees! Dan moet jy jou lewe aan sy Vaderlike sorg toevertrou.

Gebed riglyne

Laat vir een dag alle verwysings na "ek," of "myself" uit jou gebede weg. Fokus slegs op God se goedheid. Sê vir Hom dankie vir wie Hy is en wat Hy alles doen. Loof Hom vir sy goedheid in Christus orals in die wêreld.