deur Stephan Joubert

Ek is uitverkoop aan die skrywer, Philip Yancey, se definisie van genade. Hy sê dat niks wat ons ooit gedoen het, tans doen, of in die toekoms gaan doen kan maak dat God minder of meer van ons hou nie. Hy het ons in elk geval lief. God het ons lief om Christus ontwil. Hy doen dit eerstens en laastens ten spyte van ons, nie as gevolg van wie ons is nie! God se onuitspreeklike liefde vir ons is nooit prestasiegedrewe nie, maar verhoudingsgedrewe. Hoor weer, Hy kyk nie wie van ons die meeste vir Hom doen en dan het Hy ons die meeste lief nie, Nog minder hou Hy meer van ons as ons die slag gehoorsaam aan Hom is, en minder van ons as ons die dag struikel.

God is ons Vader. Daarom gebeur sy liefde vir ons sonder daardie prestasie klousules wat orals in die sakewêreld floreer. Genade is niks anders nie as God se verniet omgee vir ons. Genade is 'n Goddelike werkwoord. Dit vertel Jesus is op ons hakke met 'n hand vol goedheid. Daarom is genade eintlik 'n rus-woord vir jou en my. Nou toe, hou op met hardloop. Gaan rus in sy arms.