Daar word dikwels verwys na die tyd waarbinne ons leef as die ‘inligting gelaaide’ era. Mens hoef ook nie vêr te gaan om dit inderdaad reg te bewys nie. Wat eers ‘n ingewikkelde vraag was, kan nou opgelos word deur Google. Of hoe die Iphone, Blackberry, HTC – die ‘all in one’ pakket geword het. Die wêreld in jou sak!

Tog wanneer dit by sake kom wat ons lewe skud - wanneer my man in ‘n motorongeluk oorlede is; my tiener-seun wat probeer selfmoord pleeg; ek wat gediagnoseer word met terminale kanker - dan word hierdie instrument ‘n nuttelose objek. Dan kan Google of die wonderlike tegnologie geen antwoorde gee nie. Ons voel oorweldigend alleen, geskud deur ons menslikheid!

Dit is in hierdie omstandighede wanneer ons die vraag vra: Waar is God? Hoekom is God so vêr? Om sin te maak in en uit ons omstandighede meet ons God se nabyheid en liefde met ‘n liniaal. God is naby en liewer vir my as dit met my goed gaan, maar gooi my weg en vergeet van my as dit sleg gaan. Ons probeer God vasvang in hoe ons as mense sou optree en wanneer dit nie gaan soos ons dit wil hê nie, blameer ons God omdat Hy nie optree soos Hy ‘moet’ nie.

Daar is baie voorbeelde in die Bybel waar ons sien hoe God anders optree as wat verwag is; ons kan dink aan Job en Paulus om maar twee voorbeelde te noem. Ons kry egter in Handelinge 2 ‘n antwoord op die vraag van waar God in my lewe is. In Handelinge 2 lees ons van die Heilige Gees wat uitgestort word in ons as gelowiges. Hoe ons die vrugte van die Gees as geskenk ontvang (Gal 5:22-23). Hoe God met ons elkeen persoonlik omgaan, wagtende dat ons ook ‘n verhouding met Hom wil aangaan! Want dis alleenlik wanneer ons die Heilige Gees in ons lewe raaksien en in verhouding met God staan, wat ons met oorgawe kan JA sê vir God en ons lewe in Sy hande oorgee. Dit is dán, wanneer ons met sekerheid sal weet dat God met ons is. Dat wanneer ons bootjie skud met onbeplande situasies; ek nie hoef te vra waar God is nie, maar sal weet - God is naby en reeds saam in my bootjie!

Maryka Potgieter