deur Stephan Joubert

In Prince Caspian, die tweede boek in die gewilde Narnia reeks van die groot Christenskrywer, C. S. Lewis, is daar iewers 'n ontmoeting tussen Aslan die leeu (wat Christus verteenwoordig) en een van die dogtertjies. As sy hom na 'n lang tyd raakloop, sê sy vir hom dat hy groter geword het. Hierop antwoord Aslan: "That is because you are older, little one." "Maar is jy dan nie groter nie?" vra die dogtertjie hom. Dan antwoord hy haar: "I am not. But every year you grow, you will find me bigger."

Dit is presies wat gebeur op die Here se pad. Hy word al hoe groter in ons oë namate ons groei in ons geloof. Natuurlik is Hy die Almagtige, wat bo-oor tyd en ewigheid uittroon. Hy IS groot. Hy IS die Here, of mense dit begryp of nie. God is nie afhanklik van ons goedkeuring, kennis of aanvaarding nie. Nogtans, hoe meer ons leer om nader aan Christus te loop, hoe meer sien ons die Here se heerlikheid raak. Dan word ons probleme en kommernisse kleiner. Ken jy ook iets van hierdie omgekeerde groeipad? Hoe groter die Here in jou lewe is, hoe kleiner raak al jou sorge.