deur Luther Backer

Is mense bang vir jou? Leef hulle in vrees en bewing dat hulle dalk ‘n fout sal maak en jy hulle dan oor die kole sal haal? Kom jou werkers en vra om verskoning, of weet hulle dat as jy sou uitvind dat hulle ‘n fout gemaak het, jy soos ‘n vrag bakstene op hulle koppe sal neerkom! Nou steek hulle dit so goed as moontlik weg met die hoop dat jy niks sal agterkom nie. Of het jy ‘n hart vir mense wat hulle oortredings vergewe, hulle verskoningsaanvaar en hulle nog ‘n kans gee?

Jou huiswerker het ‘n hemp met die strykyster verbrand; een van jou plaaswerkers het nie olie in die trekker se enjin gegooi nie en groot skade aan die enjin veroorsaak; jou boekhouer het ‘n foutiewe inskrywing in die boeke gemaak, jou messelaar het te min sement by die pleistermengsel gegooi en gevolglik het die pleister baie gebars. Foute! Foute! Foute! Geen dag gaan verby in enige onderneming of huishouding  nie sonder dat daar foute van minder of meer ernstige aard gemaak word. Maar die vraag ontstaan nou- hoe hanteer jy as eienaar, bestuurder of toesighouer die werknemers se foute en mislukkings?

Wanneer ‘n persoon ‘n fout gemaak het, is dit nie noodwendig dié persoon se skuld nie. Dalk het die persoon nie verstaan wat hy moes doen nie – dalk het jy jouself nie duidelik uitgedruk oor presies wat jy verwag het nie; dalk was hy nie goed opgelei nie; dalk was die werk te veel vir hom; dalk was die roumateriaal wat hy gebruik het van swak gehalte of was die gereedskap of toerusting defek.Jy moet dus seker maak wat presies die fout veroorsaak het.

Wanner die werker erken het dat hy die fout wel gemaak het en sê dat hy  jammer is daaroor en dat hy alles in sy vermoë sal doen om die fout in die toekoms nie weer te herhaal nie, behoort jy sy verskoning te aanvaar. Die manier hoe jy hierdie insident hanteer, sal grootliks bepaal, of die werker sal leer uit sy fout en of sy agting vir jou toegeneem of afgeneem het. Is jy ‘n bestuurder, ‘n leier wat genade, barmhartigheid en vergifnis teenoor jou werkers openbaar, behoort ‘n verhouding van wedersydse vertroue tussen julle te ontstaan.

As jy ‘n goeie verhouding met jou werkers opgebou het, sal hulle weet dat as hulle iets verkeerds gedoen het, jy na hulle verduideliking sal luister en dat jy hulle sal teregwys, maar dat jy hulle sal help om dieselfde foute nie te herhaal nie. Maar dit is hierdie werkers wat vergifnis en barmhartigheid van hul hoof ontvang het wat nie sal huiwer om hulle hoof op sy beurt te vergewe as hy ‘n fout sou gemaak het en hulle in die proses benadeel het nie.

Is jy egter geneig om dissiplinêr teen jou werkers op te tree vir die geringste oortredings en jy nooit moeite doen om versagtende omstandighede vir hul optrede te soek nie, sal jou mense jou gou sien as iemand sonder genade, vergifnis of ontferming.

Wie is jy – die man wie se eie skuld afgeskryf is maar wat mense wat hom geld skuld in die tronk laat gooi het, soos beskryf in Mat. 18:26-35, of is jy die Pa van die verlore seun wat sy seun terugverwelkom het al het hy sy erfposie alles uitgemors(Lukas 15:11-31)? ‘Geseënd  is die wat barmhartig is’het Jesus self gesê as deel van Sy Bergrede (Mat.5:7).

(Bron: Bruce Winston: BE A LEADER FOR GOD’S SAKE.REGENT UNIVERSITY, 2002 ,pp 63-71).