Ja, jy ís sy kind!

Deur Milanie Vosloo

Ma’s kyk met spesiale oё na hul kinders. Nie omdat hulle altyd so oulik, slim of gehoorsaam is nie, maar omdat daar iets van God se onvoorwaardelike liefde,
onverpoosde goedheid en weer-en-weer-vergifnis in hul harte geplant is. En dalk
ook omdat sy weet dat haar kinders as’t ware ‘n verlengstuk van haarself is.
Omdat haar kinders vir die wêreld wys hoe sy lyk, hoe sy leef en hoe sy ís.

God kyk met meer as spesiale oё na sy kinders. Wanneer Hy na ons kyk, kyk Hy ver verby ons ongehoorsaamheid, sonde en gebrokenheid. Hy kyk na die bloed van sy
Seun wat al daardie dinge weggewas het en dan sien Hy in sy liefde ons
volmaaktheid. In sy groot ontfermings kyk Hy dan na ons en sê: Jy is Myne. Daarom is my liefde vir jou,
ondanks dit wat jy is, volmaak. Glo, aanvaar en beleef dit en wees dan ‘n
verlengstuk van My presies daar waar jy elke dag leef. Ja, gaan wees jy My.

Hoor jy dit? Hoor jy werklik met hoeveel liefde en deernis die Vader jou wil omarm? En met hoeveel teerheid Hy vra dat jy sy wese sal wees? Dat jy iets van sy
grootheid, goedheid en getrouheid teenoor ander sal gaan uitleef? Die vraag is:
wat maak jy daarvan? Hoor jy dit en gaan dan voort om jou kindwees-lewe op jou
manier te leef, of gaan staan jy vir ‘n oomblik stil by die kruis en sê dan:

“Here Jesus, dankie dat U, lank voor my geboorte, my reeds so lief gehad het, dat U vir my gesterf het. Dankie dat ek daarom met soveel vrymoedigheid voor die
Vader se troon kan verskyn. Grote God, vandag kom ek met ‘n nuwe hart en ‘n
nuwe gees na U toe en vra dat U my skoon sal was van myself en vol sal maak van
U. Dat U my so vol van u liefde sal vul dat ek dit eenvoudig mildelik aan ander
sal uitleef. Wys my waar ek vandag u hande, voete, oё, ore ... u hart kan gaan
wees. Ja, Here, ek wil vandag so kind van U wees, dat U na my sal kyk en sal
sê: Mooi so, my kind. Vandag het jy my
volmaakte liefde werklik gelééf.”

Mag julle in staat wees om ... te begryp hoe breed en lank, en hoe hoog en diep sy
liefde is. Dan sal julle Christus se liefde, wat alle verstand te bowe gaan,
beleef. Mag julle heeltemal met die volheid van God vervul word. Efesiёrs
3:18a, 19

O Vader-God, hoe bevoorreg is ek om u kind te wees. Neem my hand en lei my asseblief om werklik u beeld aan hierdie wêreld te leef.