John Ortberg is ’n bekende Amerikaanse predikant wat verskeie topverkoper-boeke op sy kerfstok het, waaronder Everybody’s Normal Until You Get To Know Them; If You Want To Walk On Water, You’ve Got To Get Out Of The Boat; Love Beyond Reason en Old Testament Challenge.
Richard Foster, skrywer van die klassieke Celebration of Discipline, het die voorwoord van dié boek geskryf en daarin beklemtoon hy dat daar slegs een weg is na die transformasie wat Jesus vir sy volgelinge bedoel het, en dit is langs die weg van die dissiplines.
Ortberg skryf verder oor die antieke weg van die geestelike dissiplines. Hy maak onderskeid tussen die volgende dissiplines: viering as ’n lewenswyse waar elke dag bewustelik geleef word om die volle potensiaal daarvan te ontsluit; die dissipline om stadiger te gaan sodat jy bewus daarvan kan leef dat die Here elke oomblik in en by jou is; gebed; om ’n dienaar te wees; om te bely; om die leiding van die Heilige Gees raak te sien, te verstaan en te volg; die praktyk om in die geheim te leef; en om te reflekteer oor die Skrif.
Die boek begin met ’n beskrywing van die doel van die geestelike lewe, wat egte lewensverandering is. Ortberg waarsku dat ’n pseudo-spiritualiteit ’n groot deel van die kerk kenmerk, en wat geken word deur onegtheid en ’n gebrek aan integriteit, ’n veroordelende gees, hoogmoed en meerderwaardigheid, en uiteindelik ’n matheid omdat dié spiritualiteit hoë eise aan jou stel. Ortberg verbaas hom dat mense nog agter Christus wil aanloop as hy sien hoe sommige Christene Hom party dae volg!
Ware spiritualiteit bestaan daarin om God toe te laat om sy werk self in jou te doen. En die dissiplines skep die ruimte waarbinne Hy dit kan doen.
Dié boek het al menige mens se lewe verander omdat dit baie prakties beskryf watter pad ’n Christen kan loop na lewensverandering. In die tradisie van Dallas Willard en Foster vertel dit van dissipelskap wat uit doelgerigte dissiplines bestaan.
In ’n voorlaaste hoofstuk ontwikkel Ortberg dan ’n Lewensreël soos by kloosters die geval was. ’n Gebalanseerde lewe, skryf hy, bestaan uit die volgende elemente: verhoudings, finansieel, geestelik, beroep, fisies, intellektueel en ontspanning. Wat hier skort, is die begrip dat jy jou lewe moet gee aan iets wat groter as jyself is.
Die laaste hoofstuk behandel die kwessie van lyding wat een of ander tyd oor alle Christene se paadjie kom. Die skrywer verduidelik hoe lyding, nes alle ander aspekte van lewe, God se keuse is om jou te omvorm.
Saam met die boek kom ook ’n Participant’s Guide, met ses sessies wat die boek se inligting vir jou as individu of as egpaar of as lid van ’n kleingroep ontsluit.