Deur Marius Nel

ARNOLD MOL

JY KAN WORD WAT JY IS

Praktiese riglyne vir die Christelike lewe

CUM 2010

’n Splinternuwe boek wat eersdaags op die rakke gaan wees is dié een van die bekende dr. Arnold
Mol, ’n gekwalifiseerde bedryfsielkundige wat as bedryfskonsultant werk. Hy is
’n bekende spreker wat lief is om vanuit die Bybel te dink en te praat. Sy
boeke het reeds talle mense se lewens aangeraak en het gehandel oor bestuur,
motivering, konflikhantering, ouerskap en die huwelik. Met dié boek rig hy hom
aan die adres van gelowiges wat voel dat hulle dit nie heeltemal maak nie.
Hulle beleef dit dat God teleurgesteld in hulle is en verstaan nie wat dit help
om steeds te aanhou probeer nie. En terwyl talle kerke so sterk op prestasie
fokus, verloor hulle mettertyd moed.

Daarom die ietwat vreemde titel: jy kan word wat jy is. Die drie dele van die boek is: wat ons is; wat ons kan
wees; wat ons sal wees. Die hooftema is: jy is meer as wat jy besef. Daarom:
laat waai! Begin jou lewe leef in ooreenstemming met die roeping waarmee God
jou geroep het.

Wat belangrik is, is dat ons goed besef wie ons is: mense wat streef na volmaaktheid maar dit net nie kan bereik nie. Maar ook mens wat voor God
skuldig staan omdat ons dit nie maak nie, omdat ons sondig en stukkend is en
omdat ons sonde alles stukkend breek waaraan ons vat.

Genadiglik kan ons ’n tweede verhaal vertel, van Jesus wat voor ons staan wanneer ons voor God se troon gaan staan. Van ’n glimlag op God se gesig nog
voordat Hy ons agter en in Jesus raaksien.

En daarom kan ons iets word: ’n mens wat geestelik groei, wat met skuld kan afreken op ’n Bybelse en realistiese wyse, ’n mens wie se geloof toeneem omdat
die diepte van die verhouding met God toeneem. ’n Mens wat versoekings oorwin
en leer om onaangename mense lief te hê en om mense te vergewe wat teen ons
oortree en wat lyding kan trotseer, in die Naam van die Here. Ons kan verstaan
wat God se wil vir ons lewe is. En dit alles omdat ons in ’n liefdesverhouding
met Jesus leef. Omdat Hy, in Paulus se woorde in Filippense 3, vir ons die
allerbelangrikste geword het sodat ons alle ander dinge as verlies kan afskryf.

En dan hou ons ons oog op die hoop: wat ons gaan word. ’n Nuwe mens, verheerlikte mens, in God wanneer Hy alles aan Hom onderwerp het.

’n Heerlike, geloofsopbouende boek wat jou begelei om nuut oor God, en daarom oor jouself te dink. ’n Moet vir mense wat as ’n mossie voor die spieël
gaan staan, maar ’n arend moet raaksien. Omdat Hy wat in ons is groter is as Hy
wat in die wêreld is.