Deur Milanie Vosloo

Kinders wéét dat hulle hul ouers nodig het. Sonder twyfel aanvaar hulle dat hul ouers vir hulle sal sorg, dat daar altyd genoeg sal wees om te eet, hulle warm klere
sal hê en dat hulle hul maar net kan volg. “Kinderlike geloof” noem ons dit. En
goddelike geloof noem Jesus dit wanneer Hy sê dat God se koninkryk juis bedoel
is vir mense wat soos kinders is. (Matt 19:13 – 15)

Liewe mens, ás jy weet dat jou Vader jou meer liefhet as wat enige aardse ouer sy kind ooit kan liefhê en ás jy weet dat Hy áltyd vir jou sal sorg, waarom
probeer jy dan nog so “onafhanklik”
wees? Hoekom bekommer jy jou so dikwels nog oor die dag van môre en
waarom dra jy die hele wêreld op jou skouers? Gee vandag opnuut elke aspek van
jou lewe vir jou Meester wat spesifiek vir jou sê:

· “Kom na My toe, julle
almal wat moeg is en swaar laste moet dra, en Ek sal julle lewens verkwik ...
Kom leer by My, want Ek is sag en nederig van hart, en julle sal nuwe krag kry
...” Matteus 11:28, 29b

· Deur die krag van sy
Goddelike heerlikheid sal Hy julle toerus met al die krag wat julle nodig het
om in alle omstandighede geduldig te volhard. Kolossense 1:11

· “ ...Alles wat julle
in gebed van God vra, sal julle ontvang, mits julle God daarmee vertrou.”
Matteus 21:22

Kinders kan ongekunsteld speel en die lewe ongekompliseerd geníét omdat hulle wéét hulle is in veilige hande! Jy is ook! Aanvaar vandag die Vader se sorg in jou lewe. Gaan
dan en geníét dit om sommer net te lééf!

Ek verklaar vandag dat ek U nodig het en dat ek nie een tree van my lewe sonder U wil gee nie. Hou my asseblief styf in die holte van u hand vas en neem my op die weg wat ek moet
loop. Ja, Here, neem my las en maak my hart weer lig asseblief.