Die lewe het ‘n manier om met ons weg te hardloop. Van hanekraai totdat ons ons koppe weer neerlê, is daar maar altyd ‘n 101 dinge om te doen. As ons nie met die huishouding en ons kinders besig is nie, wag die inkopielys ongeduldig op ons of eis iemand anders ons aandag en tyd op. Op ‘n plaas, meer as in enige ander huis, is die werk nooit klaar nie. Daar sal áltyd nog iets wees wat gedoen moet word.

Juis daarom is dit vir die Satan so maklik om ons van ons tyd saam met God af weg te rokkel. Hy weet net hoe besig hy mense moet hou om hulle van die Vader af weg te hou. En so gebeur dit dat ons geleidelik – sonder dat ons dit regtig agterkom – al hoe verder van ons Vader verwyderd raak ... totdat ons later nie eens meer die vrymoedigheid het om met Hom te praat nie.

Wanneer ons ver van Hom af is, is dit nie Hý wat wegbeweeg het nie, dis óns wat weggeskuif het. Dis ons wat – om watter rede ook al – ons fokus op ander dinge geplaas het of bloot net nie tyd aan Hom afgestaan het nie. Intussen wag Hy, soos die pa van die verlore seun, met groot verlange op ons en wens Hy dat ons maar net weer huis toe sal kom.

Kom ons probeer om vanjaar weer meer tyd vir ons liefdevolle God te maak. Kom ons sorg dat ons ondanks ons besige program tyd maak om aan ons Vader se voete te gaan sit, sy stem te hoor en weer die vrede te voel wat ons net by Hom kan vind. Ja, kom ons besluit sommer nou dat ons hierdie maand aan Hom gaan wy sodat ons weer diep in ons harte die bevryding kan beleef dat die Gees by ons is, ons met sy tere liefde omhels en elke oomblik daar is om ons met sy genade en seёn te bederf.

Kom ons bid:

Gees van God, ek erken dat ek ietwat verdwaal geraak het. Dat ek mettertyd van U af wegbeweeg het. Help my om weer my pad huis toe te vind. Om weer in u troue arms te wees en te voel hoe U my lief het. Maak my stil genoeg sodat ek u stem sal hoor, geduldig genoeg sodat ek sal wag op u boodskap aan my en doelgerig genoeg dat ek u wil sal doen. Gee aan my in dié maand die rykdom van u teenwoordigheid en help my om dan onlosmaaklik deel van u heiligheid te bly. Ja, Here, maak my weer ‘n naby-aan-U-kind!