Toe nie soos "almal" nie

deur Stephan Joubert

"You made my day," sê die petroljoggie nou die dag vir my. 'n Breë glimlag sprei regoor sy gesig. Ek was oorbluf. "Wat het ek gedoen?" vra ek totaal verbaas. "You called me sir!" antwoord hy. Toe vertel hy my hoedat mense hom dikwels afjak en selfs met minagting behandel. Hy wou weet hoekom ek hom "sir" genoem het. Al waaraan ek kon dink, is dat die Here se Woord my leer om mense met respek te behandel en dat ek presies dit probeer doen. Toe sê ek dit vir hom.

Toe ek daar van die vulstasie af wegry, besef ek net opnuut weer hoe maklik dit eintlik is om klein dingetjies in die Heer se Naam te doen, soos om mense met respek te behandel. Hoe jammer dat ek nie aldag ewe goed daarin slaag om elkeen wat my pad kruis op die hande te dra nie. Ewe jammer dat, toe ek hierdie verhaal iewers gedeel het, iemand dadelik vir my sê ek leef seker nie in die regte Suid Afrika nie. "Bedelaars, petroljoggies en werkloses is net daarop uit om te steel en te plunder," het hy bygevoeg. "Eintlik doen almal dit deesdae," was sy konklusie.

Ekskuus, maar ek het nie die luukse om te veralgemeen soos hierdie beswaarde nie. Ek ken nie vir "almal" na wie hy verwys nie. En ek weet ook nie wat "almal" se bedoelings is nie. Maar die Here Jesus leer my in Matteus 5-7 dat ek nie die luukse het om te veralgemeen deur soos "almal" te dink of te leef nie. Daarom weet ek die persoon hier reg voor my is nie "almal" nie, maar 'n unieke skepping van God. Daarom probeer ek hom of haar nie soos "almal" behandel nie.