deur Stephan Joubert

Geen twee mense op aarde deel ooit dieselfde vingerafdrukke nie. Maar het jy geweet ons oogafdrukke is ewe uniek? Die ontwikkelaar van die Iris ID, John Daugmann van Cambridge Universiteit in Engeland, het reeds meer as 30 miljoen oogafdrukke van mense met mekaar vergelyk. Geen een van hulle is dieselfde nie. Asof dit nie genoeg is nie, kan ons elkeen se 23 paar chromosome op 8,388,608 verskillende maniere verbind. Dit roep hardop uit dat ons elkeen uniek is.

Nie net ons vingerafdrukke en ons oë sê egter dat ons uniek, kosbaar en spesiaal is nie. God bevestig dit oor en oor in die Bybel. Vat maar net Psalm 139:14 waar Dawid dit uitjubel dat die Here ons op 'n wonderbaarlike manier aanmekaar gesit het. Ons is die absolute hoogtepunt, die magnum opus, van al God se handewerke hier op aarde. Dalk is dit hoekom Vincent Van Gogh op 'n keer gesê het Christus is die grootste Kunstenaar ooit. Volgens Van Gogh werk Hy egter net met lewende kunswerke in plaas van dooie standbeelde! Christus omvorm lewende mense met sy aanraking in beelddraers van die lewende God.

Hoekom praat ons soms so afbrekend oor onsself as ons dan so uniek aanmekaar geweef is? Hoekom fokus ons graag op ons tekortkomings? Sien 'n slag raak dat daar net een soos jyself in die hele heelal is. Laat jou een en enigste lewe voltydse hemelse musiek vir God maak. Maak goeie klanke met daardie bietjie, of die baie kanse en geleenthede wat jy tot jou beskikking het. Laat elke oomblik tel... want dit doen!


Gebedsriglyn

Wees dankbaar voor God oor die uniekheid van die ganse skepping.